中菲外交（左丁山）

livefreakss

中菲外交

菲律賓雖然係一個貪污成風，低效率嘅國家，但畢竟繼承咗美國式民主制度，得其軀殼，兼且傳媒自由，言論不禁，故此表面工夫仍然做到足：例如八二三馬尼拉魔警殺人事件之後，菲律賓國會嗱嗱聲召開美國式聽證會，於是我地知道咗在警匪對峙緊張時期，市長去咗食飯，副市長去咗酒店飲咖啡，總統受勸告去小睡片刻（西班牙遺留文化），業餘談判員 A想話制服魔警門多薩，但俾上司否決，警察要打電話俾門多薩，電話唔通，原來係電台訪問門多薩雞啄唔斷，申訴專員涉嫌敲詐門多薩，總之烏龍百出，令人哭笑不得。
調查、聽證之後，你估會唔會有下文呢？一位在菲律賓有生意淵源嘅福建幫富豪對左丁山講：「菲律賓人嘅快樂指數比香港人高，佢地好似對任何事都抱一個嬉戲態度，對周圍無日無之嘅殺人案，睇到麻木晒，總之過得一日得一日。國會調查，出完報告之後，好快就冇人記得嘅嘞，頂多有一兩個人辭職了事，再有下一次出事，一樣亂咁嚟。」唉，菲律賓風情如此，港人能有幾多愁，或者憤怒？

呢位福建幫商人心水清，突然間問一句：「喂黃士心老闆去咗邊？」啊，佢唔講都唔記得咗，自八月二十三日起，康泰旅遊大老闆黃士心似乎未見公開發言，全部事情由離職前嘅總經理劉美詩處理，包括見記者解畫等等，劉美詩又真係醒嘅，表現淡定，不卑不亢，果然係有經驗，見過世面之人，康泰以後冇咗劉阿姐，黃士心父子掛帥，辛苦啲噃。聽一位記者講，佢地曾經搵過黃老闆，黃生慨嘆馬尼拉警察壞事，但之後就轉趨低調，大概在幕後策劃啩。

講到幕後，唐司長匆忙上京一轉，即刻引起眾多猜測，傳言四起，其中一個傳言就係為八二三事件 debriefing及聽取「大勢、國情」。今天之國情係乜？美韓在黃海演習，中國海軍在黃海試射導彈，其中有無微言大義？唉吔吔，如果香港有甚麼次主權嘅話，一定要附屬附從大主權之下，不能損害中國外交大戰略─反美國海上圍堵中國，不會放棄拉攏菲律賓！傳言話北京驚住曾唐唔明白，只顧提高民望喎。傳言是否可信，好難講，有一樣嘢好易講，但會刺激香港人感情嘅，就係中國之外交利益不圍繞香港旋轉。

（左丁山）